कालेबुङमा भयो अचम्मको फुटबल टुर्नामेन्ट

कालेबुङका रेफरीले कुटे झारखण्डका खेलाडीहरूलाई

मनोज-प्रज्ज्वल वोगटी
कालेबुङ,12 अगस्त।
संसारभरि नै फुटबल खेल आयोजना हुन्छ तर आजको कालेबुङमा जस्तो घटना विश्वको कुनै ठाउँमा घटेको छैन। खेलाडीहरूबीच धक्काधक्कीभएको पनि देखिएको छ, धम्साधम्सी भएको पनि देखिएको छ, रेफरीहरूमाथि हातापाई भएको पनि देखिएको छ तर रेफरीहरूले खेल सक्ने वित्तिकै खेलाडीहरू पिटेको कहीँ देखिएको थिएन जो आज कालेबुङमा देखियो।कालेबुङ स्पोट्‌र्स एसोसिएसनले मे ला ग्राउण्डमा खेलाइरहेको स्वतन्त्रता दिवस फुटबल टुर्नामेन्टमा रेफरीहरू कति स्वतन्त्र रहेछन्‌, त्यो झारखण्डका खेलाडीहरूलाई रेफरी टोलीले देखाइदिए।

घटना यसरी घ ट्यो
स्वतन्त्रता फुटबल टुर्नामेन्टको आज पहिलो सेमि फाइनल थियो। खेल थियो झारखण्ड साउथ-इष्ट फुटबल रेलवे अनि गोर्खा बिग्रेट लखनउबीच। खेललाई निर्णय गरिरहेका थिए प्रमुख रेफरी प्रमोद गुरूङ, थर्ड अम्पायर महेश छेत्री अनि लाइन्य म्यान इष्टमन लेप्चा अनि अर्जुन भुजेलले। खेल भइरहेको थियो। पहिलो गोल गोर्खा बिग्रेटले लगायो। दोस्रोपल्ट झारखण्डले गोल गर्दा लाइनम्यानले त्यसलाई अप्साइड देखाए। झारखण्डका उत्तेजित एक खेलाडी दगुरेर आउँदा अचानक एक लाइनम्यानसित ठोक्किए। लाइन्स म्यान लडे। तिनी लडेपछि तत्कालै खेलाडीलाई रेफरीले रेड कार्ड देखाएर खेलबाट बाहिर गरिदिए। घटना यति मात्र हो। खेल भइरह्यो अनि झारखण्ड 2 गोलको विरुद्ध गोर्खा बिग्रेटबाट 6 गोल पाएर पराजित बन्यो।

खेलाडीहरू अस्पतालमा
खेल सकिएको सिटी त रेफरीले फुक्यो तर त्यसपछि भने कालेबुङका ती चार रेफरीहरूले आफ्नो खेल शुरू गरे। झारखण्डका एक खेलाडी मूलतम सिंहले यसबारे यसरी आरोप लगाएका छन्‌, मूल कारण के हो थाहा छैन,लाइनम्यानसित ठोक्किएको रिस्‌ हो कि अथवा कुनै खास कारणले हो थाहा छैन तर खेल सक्ने वित्तिकै हामीलाई चार रेफरी अनि कमिटीका चार सदस्यले कुट्‌न थाले। दर्शकहरू हाम्रा पक्षमा उत्रिएकोले हामी बॉंच्यौं। यही मौकामा हामी भागेर थाना आइपुग्यौं। हाम्रा धेरै साथीहरूलाई गम्भीर चोटपटक लाग्यो। साथीहरू ग्राउण्डबाट अस्पताल लगिएको छ। धेरै ठाउँ फुटबल खेलियो तर यस्तो खाले फुटबल खेलिएको थिएन। हामी कालेबुङबासीलाई अनुरोध गर्छौं यस्तो खाले खेलाडीलाई रेफरीले पिट्‌ने खेल अब कहिले नखेलाइयोस्‌। यस्तो असुरक्षा हुन्छ भने, खेल्न आएकोले पिटाइ खाइन्छ भने यस्तो खेल नखेलाइएकै राम्रो। तिनले अझ भने, हामी 2 हजार किलोमिटर टाडाबाट बोलाएकोले पहुना भएर खेल्न आएका हौं। घटनाबारे पुलिसलाई जानकारी गरेका छौं, तर मुद्दा भने हाल्दैनौं। टाडाबाट मुद्दा धाउन सक्दैनौं।

खेल सक्ने वित्तिकै रेफरीहरूले झारखण्डका खेलाडीहरू पिट्‌न थालेपछि माहौल नै अशान्त बन्यो। दर्शकहरू मैदान झरे र झारखण्डका खेलाडीहरूको बचाउमा उभिए। खेलाडीहरू भागरेभाग भए। भाग्ने भागे, नभाग्नेहरूले खानुसम्म रेफरीहरूको पिटाइ खाए। भागेका खेलाडीहरू सोझै थाना पुगेपछि एकैक्षणमा आइसी प्रसाद प्रधान दलबलसहित ग्राउण्ड पुगेपछि स्थिति सामान्य गरियो। आइसी प्रसाद प्रधानले मैदानमा उत्तेजित दर्शकहरूलाई आरोपीहरूलाई कार्वाही गरिने आश्वासन दिँदै स्थिति सामान्य भयो।

भोलि बाहिरका खेलाडीहरू नखेल्ने सम्भावना
रेफरीहरू घटनापछि कता सुइँकुच्चा ठोके पत्तो पाइएन। यता केएसएका सचिव प्रण्य शिलालले रेफरीहरूको आफ्नै एसोसिएसन रहेको अनि केएसएले उनीहरूलाई कन्ट्राक्टमा ल्याएको बताउँदै भने, जुन घटना भयो, त्यो नहुनु पर्थ्यो। झगडा गराउने हाम्रो उद्देश्य होइन। दोषीहरूलाई कार्वाही गर्नेछन्‌। भोलीको खेलमा कालेबुङका रेफरीहरू लगाउनेछैनौं। बाहिरबाट नै मगाउने कोषिश गर्नेछौं। लडाई कतिबेला भयो हामीले थाहा पाएनौं। जुन धक्काधक्की भएको थियो, त्यसको निम्ति खेलाडीलाई माफ माग्न लगाउन हाम्रो सल्लाह भइरहेको थियो तर अचानक यस्तो घटना घटेकोले तत्काल हामीले केही गर्न सकेनौं। यस घटनाको कारण भोलीदेखि उताका खेलहरू खेल्न कालेबुङमा बसेका बाहिरका खेलाडीहरू असुरक्षाकोकारण नखेल्ने भनेर चलिरहेको हल्ला सम्बन्धमा प्रश्न गर्दा तिनले खेलाडीहरूको सुरक्षाको जिम्मेवारी लिएर सबैलाई मनाएर खेलाउने बताए।
यता गोर्खा जनमुक्ति मोर्चाका कालेबुङ सचिव शुभ प्रधानले घटनालाई दुर्भाग्यपूर्ण बताउँदै स्वाधिनता दिवस आउन दुइदिन मात्र रहेको अनि दिवसको मुल आकर्षण नै फुटबल रहेकोले सबैलाई संयम कामय गरिदिने आह्वान गरे। तिनले भने, ग्राउण्डमा खेल भइरहँदासम्म रेफरीसित नै प्रसाशन रहन्छ तर खेल बाहिर कसैलाई पनि यसप्रकारको कुटपिट हुन्छ भने निश्चय नै उनीहरूलाई पुलिसले कार्वाही गर्नेछ। तिनले स्वाधिनता दिवसलाई मध्यनजर गर्दै कसैलाई पनि उत्तेजित नभइदिने अनि शान्ति कायम राखिदिने आह्वान पनि गरेका छन्‌।