च्याब्रुङ प्रतियोगिता सम्पन्न

कालेबुङ, 14 अक्टोबर।
बुधबारदेखि कालेबुङमा सम्पन्न तीन दिवसीय अन्तराष्ट्रिय इसाई लिम्बू पवित्र सम्मेलनलाई आज समापन गरियो। दुइ दिनसम्म पीएफसी चर्चमा विविध कार्यक्रम भएपछि सम्मेलनको आज अन्तिम दिन स्थानीय रामकृष्ण रङ्गमञ्चमा लिम्बूहरूको सांस्कृतिक च्याब्रुङ नृत्य प्रतियोगिता सम्पन्न भयो। सम्मेलनमा अंशग्रहण गर्न नेपाल, दार्जीलिङ, सिक्किम, मिजोराम, नागाल्याण्ड आदिका ख्रिष्टीय लिम्बू प्रतिनिधिहरुको उपस्थिति थियो।
मुख्यरूपमा नेपाल इलाका अध्यक्ष रेभरेन्ट दानियल सुब्बा, दार्जीलिङ इलाका अध्यक्ष मिकाहाङ सुब्बा, सिक्किमका टीबी टामलिङ आदि उपस्थित थिए। उत्तर सिक्किम, नेपालको पॉंचथर, इलाम, दार्जीलिङ आदिका प्रतियोगीहरूबीच च्याब्रुङ नृत्य प्रतियोगिता सम्पन्न भयो। आसामबाट प्रताप सिंह पोटी, सिक्किमबाट टीबी टामलिङ अनि इलामबाट विनोद साङदेन प्रतियोगिताका निर्णायक रहेका थिए।