21औं पी.आर. प्रधान मेरिट अवार्ड अनि १५ औं अन्तर विद्यालय हाजिरी जवाब प्रतियोगिता 2011

प्रज्ज्वल वोगटी
कालेबुङ, ६ अगस्त।
एसयूएमआईको पञ्च रजत जयन्तीको कार्यक्रम अनुरूप चौथो चरणको तीनदिने 21औ पी.आर. प्रधान मेरिट अवार्ड अनि अन्तर विद्यालय हाजिरी जवाब प्रतियोगिता 2011 आज अन्तिम दिन भव्यतापूर्वक समापन गरियो। एसयूएमआईले प्रदान गर्ने गरेको यस वर्षको पी.आर. प्रधान मेरिट अवार्ड माध्यमिक परीक्षामा महकुमाकै सर्वोत्कृष्ट 83.9 प्रतिशत अङ्‌क प्राप्त गर्ने कन्या उच्चतर विद्यालयकी छात्रा ट्रीजा राई अनि सन्त जर्ज विद्यालय पेदोङका 82.3 प्रतिशत अङ्‌क हासिल गर्ने छात्र रिपेश राईलाई पी.आर. प्रधानकै बाहुलीबाट प्रदान गरियो।

यसरी नै चौधवटा दलहरूले अंशग्रहण गरेको 15औं अन्तर विद्यालय हाजिरी जवाब प्रतियोगितामा सबै विद्यालयहरूलाई उछिनेर विजयी दल बन्यो सप्तश्री ज्ञानपीठ अनि उपबिजेता बन्यो सन्त जोसेफ कन्भेन्ट। यी दुवै दलहरूलाई विद्यालयले स्मृति चिह्नसहित पारितोषिक प्रदान गर्‍यो।

आज तीनदिने कार्यक्रमको अन्तिम दिनमा मुख्य अतिथिको रूपमा सिक्किमका मुख्य सचिव उगेन भोटिया रहेका थिए। महकुमा अधिकारी एल.एन. शेर्पाको सभापतित्वमा सम्पन्न भएको कार्यक्रममा क्षेत्रभरिका विभिन्न विद्यालयका विद्यार्थीहरू, शिक्षक-शिक्षिकागण लगायत अन्य विशिष्ट व्यक्तिहरूको उपस्थिति रहेको थियो।

मुख्य अतिथिको बाहुलीबाट विद्यालयको झण्डोत्तलन गरेपछि शुरू भएको कार्यक्रममा विद्यालयकै सिनियर मास्टर जे.एस. राईद्वारा सर्वप्रथम बाइबल पठन अनि प्रार्थना भएको थियो। स्थानीय वृन्दावन स्कूलका विद्यार्थीहरूले स्वागत नृत्य प्रस्तुत गरी कार्यक्रम आरम्भ भएको थियो।स्थानीय स्प्रीङडेल एकाडेमी अएनि रकभेल एकाडेमीका विद्यार्थीहरूले कार्यक्रमलाई अझ रोचक बनाउँदै नृत्य प्रस्तुत गरेका थिए भने अन्य विद्यार्थीहरूद्वारा गीत पनि प्रस्तुत गरिएको थियो।

यस वर्षको माध्यमिक परीक्षामा 60 देखि 60.9 प्रतिशत अङ्‌क हासिल गरी पहिलो दर्जामा उत्तीर्ण हुने विद्यार्थीहरूलाई हिजो सम्बर्द्धना जनाइएको थियो भने आज त्यसभन्दा अधिक अङ्‌क हासिल गर्ने महकुमाभरिका विद्यार्थीहरूलाई पनि सम्बर्द्धना जनाइयो। जसमा विभिन्न विषयहरूमा सर्वोत्कृष्ट अङ्‌क हासिल गर्ने विद्यर्थीहरूलाई पनि सम्बर्द्धना जनाइयो।

सोही अवसरमा महकुमाभरि नेपाली विषयमा सर्वोत्कृष्ट अङ्‌क हासिल गर्ने सन्त फिलोमिनाकी छात्रा अन्नामेरी लेप्चालाई भाइचन्द प्रधान स्मृति पुरस्कार प्रदान गरियो। एसयूएमआई विद्यालयभरिमा नेपाली विषयमा नै सर्वोत्कृष्ट अङ्‌क हासिल गर्ने छात्र निश्चल खत्रीलाई पनि स्व. ए.बी. छेत्री स्मृति नगद राशि पुरस्कार प्रदान गरियो।